Ode a Bianca

Bianchina di Totò
 

Io stongo 'e casa 'o vico Paraviso,
tengo tre stanze all'urdemo piano,
'int''a stagione, maneche e 'ncammisa,
mmocca nu miezo sigaro tuscano,
mme metto for''a loggia a respirà.

Aiere ssera, quase a vintun'ora,
mentre facevo 'a solita fumata,
quanno mme sento areto 'nu rummore:
'nu fuja-fuja... 'na specie 'e secutata...
Mm'avoto 'e scatto e faccio: "Chi va là?"

Appizzo ll'uocchie e veco 'a dint''o scuro
Bianchina, ferma nnanze a 'nu pertuso
'e chesta posta! Proprio sott''o muro.
Ma dato ch'era oscuro...era confuso,
non si vedeva la profondità.

St'appustamento ca faceva  'a gatta,
a ddi' la verità, mme ncuriosette...
Penzaie: Ccà nun mme pare buono 'o fatto;
e si Bianchina 'e puzo nce se mette,
vuol dire qualche cosa nce adda sta'.

E, comme infatti, nun m'ero sbagliato:
dentro al pertuso c'era un suricillo
cu ll'uocchie 'a fore... tutto spaventato,
...'o puveriello nun era tranquillo,
penzava: Nun mm''a pòzzo scapputtià.

Tutto a nu tratto 'o sorice parlaie
Cu 'na parlata in italiano puro:
"Bianchina, ma perchè con me ce l'hai?
Smettila, via, non farmi più paura!"
Dicette 'a gatta: "I' nun mme movo 'a ccà!"

"Pietà, pietà, pietà! Che cosa ho fatto?"
E s'avutaie 'e botto 'a parte mia:
"Signore, per piacer, dica al suo gatto
che mi lasciasse in pace e così sia!"
"Va bene, va', Bianchì...làscelo sta'!"

"Patro', trasitevenne 'a parte 'e dinto,
che rispunnite a ffa' mmiezo a sti fatte?
Stu suricillo ca fa 'o lindo e pinto,
mme ll'aggia spiccià io ca songo 'a gatta,
si no ccà ncoppa che ce stongo a ffa'?"

"Va bene, -rispunnette mbarazzato-
veditavella vuie sta questione,
però ccà ncoppa nun voglio scenate;
e ricordate ca songh'io 'o padrone
e si rispetta l'ospitalità".

"È inutile che staje dint''o pertuso,
-a gatta lle dicette- chesta è 'a fine...
Si cride 'e te scanzà, povero illuso!
Hè fatto 'o cunto ma senza Bianchina...
Songo deciso e nun mme movo 'a ccà!"

"Pietà di me! Pietà, Bianchina bella!"
Chiagneva e mpietto lle tremava 'a voce,
cosa ca te faceva arriccià 'a pelle.
Povero suricillo, miso 'ncroce
Senza speranza 'e se puté salvà!

"Va buo', pe chesta vota 'izela 'a mano,
cerca d''o fa' fuì stu suricillo,
chello ca staje facenno nun è umano,
te miette 'ncuollo a chi è cchiù piccerillo...
Embè, che songo chesti nnuvità?"

"'O munno è ghiuto sempe 'e sta manera:
'o pesce gruosso magna 'o piccerillo
(mme rispunnette 'a gatta aiere ssera).
Pur'io aggio perduto 'nu mucillo
Mmocca a nu cane 'e presa: ch'aggia fa'?"

"Ma cosa c'entro io con quel cagnaccio!
Anch'io ho una mammina che mi aspetta:
Gesù Bambino, più non ce la faccio!
Nella mia tana vo' tornare in fretta;
se non mi vede mamma mia morrà!"


'O suricillo già vedeva 'a morte
e accumminciaie a chiagnere a dirotto,
'o core lle sbatteva forte forte,
e p''a paura se facette sotto.
Mm'avoto e faccio 'a gatta: Frusta llà!

'A gatta se facette na resata,
dicette: "E si po' jate 'int''a cucina
e truvate 'o ffurmaggio rusecato,
pecchè po' v''a pigliate cu Bianchina?
Chisto è 'o duvere mio... chesto aggia fa'!"

In fondo in fondo, 'a gatta raggiunava:
si mm''a tenevo in casa era p''o scopo;
dicimmo 'a verità, chi s''a pigliava
si nun teneva 'a casa chiena 'e topi?
Chiaie 'e spalle e mme jette a cuccà!